English engineer hmingthang, motor car siamtu company lar Rolls-Royce dintu zinga mi Sir Frederick Henry Royce, (1st Baronet, OBE) kha vawiin ang, #March_27, 1863 kuma piang a ni. Charles Rolls (1877–1910) leh Claude Johnson (1864–1926) te nen thawk hovin kum 1904 khan Manchester, England_ah Rolls-Royce company hi an din a ni. Royce hi kum 1933 khan a boral.
Rolls-Royce car te leh thil dang pawh, brand hlu leh lar zualte hi chu an inngaihlu thiam a, an company thil siam hi a leina màn nei nazawng an leitir phal ngai lo te an ti. Mi lar, an thil neih larpui thei ngei tura an hriat te hnenah chauh an hralh ṭhin te an tih hi mawle. Rolls-Royce te pawh hi chutiang zinga mi chu a ni a, a lo chhe palh a nih pawhin company lamin a siam turin an pan mai ṭhin....te an ti; tak tak ni maw (ka la nei ve lo va, ka hre ve chiah lo 😁).
Rolls-Royce sawi takah chuan, thil dangdai angreng tak, an sawi sup sup ṭhin hi sawi ve lawk ang.
British sawrkarin India ram a awp lai, kum 1920 khan India lal zinga pakhat Maharaja of Alwar- Jai Singh Prabhakar chu London khawpuia kawrthler Mayfair Area_ah a lal thuam inbel lovin, mi naran angin a teihawi mai mai a. A tihtur hre lo chu Rolls-Royce car showroom pakhatah hian a tei lut satliah a. Dawr manager, sap pa chuan Maharaja a ni tih a lo hre si lo va, vai satliah mai mai emaw a lo ti a ni ang chu, a lo be ṭha duh lo va, chu mai ni lovin, pawnah a lo nawr chhuak ta mai a.
Jai Singh chu a thin a rim hle mai a, mahse engmah sawi lovin a thlenna hotel lamah a haw ta a. Chutah le, a official te kovin showroom chu Maharaja_in a tlawh dawn tih a hrilhtir ta a. Chumi hnua a va kal leh chuan showroom hnathawkte chuan red carpet lo phahin, a thawk zawng zawng chu Maharaja dawngsawng turin an lo intlar ṭhap mai a.
Showroom_ah chuan Rolls-Royce car chu pho chhuah lai mek 6 a lo awm a. A vaiin Maharaja chuan a lei a, lawnga India rama dahna tur senso zawng zawngte nen vek, a pawisa faiin a pe tla nghal ṭhak a.
Maharaja chu a haw ta a, a Rolls Royce car lei thar 6 chu municipal thuneitute hnenah pein, Delhi khawpui hmun kilkhawr tinrenga bawlhhlawh khàwn khawm nan leh paih nana hmang turin thu a pe ta a ni.
India ramah Rolls-Royce car chu bawlhhlawh paih nan an hmang ṭhin tih chu kar lovah khawvel pumah a thang chhuak ta thuai a, chu chuan Rolls-Royce hlutna chu nasa takin a titla hniam a, an sum lak luh pawh a tlem phah ta kawk kawk mai a ni.
A tawp a tawpah Rolls-Royce company chuan thil awmdan zel tur chu an ngaingam ta ngang lo va, Maharaja hnenah chuan ngaihdàm dilna lehkha (telegram) thawnin, an thil lo tihsualah chuan thupha an chawi a, a thlawna Rolls-Royce car thar dang 6 pek tiamin, car chu bawlhhlawh paih nana hmang tawh lo turin an ngen a. Jai Singh pawh chu a inphah hniam a, an ngaihdàm dilna leh an thilpek chu pawmin Rolls-Royce car hmanga bawlhhlawh paih chu a titawp ta a ni.
** He thu hi a lar hle a, ṭhenkhat erawh chuan bawm ak thu mai mai, tuin emaw Rolls-Royce car hmaa hmuhphiah intar a hmuh aṭanga a phuahchawp niin an sawi ve thung. A enga pawh chu ni se, entir nei ṭha tak thu chu a ni ve hrim hrimin ka hria.
No comments:
Post a Comment