Himanta Biswa Sarma hi ukil leh politician niin Assam chief minister a ni mek a, Assam CM 15na a ni. Politics_ah hian Indian National Congress pawl a ni ṭhin a, August 23, 2015 khan BJP a zawm a ni. Assam MLA_a thlan a nih hmasak ber hi kum 2001 kha niin, Jalukbari bial aṭangin Indian National Congress aiawha thlan a ni.
Congress aṭanga a ban avang hian Congress hotu Rahul Gandhi nen an inhmuh thiam loh phah nasa hle. Kum 2016 Assam MLA inthlanah khan a kaihhruaina hnuaiah BJP hi hneh taka thlan tlin an ni a, May 24, 2016 khan Cabinet Minister atan lak luh a ni a BJP hian North-East Democratic Alliance (NEDA) huaihawttu- convener atan a ruat a ni.
NEDA hi sawrkar laipuia BJP leh a thawhpuite inhlawm khawm pawl National Democratic Alliance (NDA) peng pakhat niin India hmar chhaka NDA tihchakna tura din a ni.
Sarma hi Assam mipui, amah thlangtute chuan MAMA tiin an ko ṭhin.
Sarma hi February 1, 1969 kuma Jorhat, Assam_a piang kha a ni a. A pa hi Kailash Nath Sarma niin a nu chu Mrinalini Devi a ni. A pa lama an thlahtute hi Latima, Nalbari district lam chhuak an ni. June 7, 2001 khan Riniki Bhuyan Sarma nen an innei a. Fapa Nandil Biswa Sarma leh fanu Sukanya Sarma te an nei a ni.
Sarma hian Kamrup Academy School, Guwahati_ah zirna bul ṭanin a kal ṭhin a, chutah Cotton College, Guwahati_ah a zir chhunzawm a ni. Kum 1991 leh 1992 khan Cotton College Students Union_ah General Secretary atan thlan a ni nghe nghe.
Kum 1990 khan Political Science_ah BA a zo va, 1992 khan he subject_ah tho hian MA a zo leh bawk. Hemi hnu hian Government Law College, Guwahati aṭangin Bachelor of Laws a zo leh a, kum 1995 khan ukil- solicitor a ni ta a. Kum 1996 aṭanga 2001 inkar khan Gauhati High Court_ah ukil hna hi a thawk ta a ni. Kum 2001 khan Gauhati University aṭangin Political Science_ah Doctorate of Philosophy a zo va, hemi hnu lawk hian politics luhchilhin MLA atan thlan a ni ta a ni.
Sarma hi kum 2001 khan Assam Legislative Assembly_ah Jalukbari bial aṭanga thlan tlin a ni a, Assam rama party langsar tak Asom Gana Parishad hruaitu Bhrigu Kumar Phukan a hneh. Hei hi politics_a thlan tlin a nih hmasak ber a ni. Mipuiin an duh hle a ni ang, he bial aṭang hian a zawn zatin ṭum nga thlan tlin a ni tawh. 2011 phei hi chuan a khingpui hi vote 78,000_in a hneh a ni.
Minister of State leh Cabinet Minister a nih chhungin Sarma hian chanvo- portfolio pawimawh tak tak a chelh tawh a. Kum 2002 aṭanga 2014 inkara Minister of State a nih laiin department pawimawj tak tak- Agriculture, Planning & Development, Finance, Health, Education leh Assam Accord Implementation a enkawl tawh a ni.
Kum 2006 khan Cabinet Minister niin Health a enkawl a, 2011 khan Education a enkawl tel bawk. A Minister_na hnuaiah hian Jorhat, Barpeta leh Tezpur_ah te Medical college din a ni a. Hei bakah hian Diphu, Nagaon, Dhubri, North Lakhimpur leh Kokrajhar hmuna Medical college dinna turah pawh chanvo pawimawh tak a chelh bawk. Heng hmuna medical college te hi tipuitling tura hna thawh mek a ni.
Minister a nih chhung hian hna a thawk nasa hle a ni ang, Government of India_in kum khat chhunga a hnathawh hrang hrang report a tihchhuah ṭhinah Assam sawrkar hnuaia Health leh Education department hlawhtlinna hi tarlan tel tur a awm deuh ziah a ni. Education a enkawl chhung hian zirtirtu laknaa interview awm ṭhin chu tibovin Teacher Eligibility Test (TET) kaltlangin zirtirtu 5000 chuang a la a, hetianga zirtirtu lak hi Assam ramah a vawi khatna a ni.
Politics thila Assam chief minister ṭhin Tarun Gogoi nen ngaihdan inang lo an nei avangin July 21, 2014 khan Sarma hi sawrkara a nihna zawng zawng aṭangin a bang vek a. Jalukbari bial aṭanga MLA a nihna erawh chu September 15, 2015 khan a bansan chauh thung.
August 23, 2015 khan Bharatiya Janata Party (BJP) a zawm a, a zawmna hmun hi New Delhi_a Amit Shah inah a ni. BJP hian inthlan lo awm turah Assam rama Election Management Committee convener atan a ruat a. Kum 2016 May thla khan Congress party aiawha a zawna ṭum 3 a lo tlin tawhna Jalukbari bial aṭangin BJP aiawhin thlan tlin a ni ve ta thung a ni.
2016 hian Assam_ah hian BJP_in sawrkar an siam ta a, hei hi India Hmar chhaka BJP_in sawrkar an siam hmasak ber a ni. May 24, 2016 khan Sarma chu Chief minister Sonawal hnuaiah Cabinet Minister atan lak luh a ni ta a. Portfolio pawimawh tak tak- Finance, Health & Family Welfare, Education, Planning & Development, Tourism, Pension & Public Grievances te a chang a ni.
2021 MLA inthlanah thlan tlin a ni leh a. Sarbananda Sonowal thlakin May 10, 2021 khan Assam Chief Minister atan lak luh a ni ta a, BJP sawrkarah hian a kai sang chak hle a ni.
April 23, 2017 khan Badminton Association of India president atan hneh taka thlan tlin a ni a. Assam Babminton President a ni tel bawk. 2016 June thlaa party lama a thawhpui Pradip Buragohain chu Assam Cricket Association secretary a nih khan Sarma hi President a ni ta a. Hemi hma, kum 2002 aṭanga 2016 chhung khan Assam Cricket Association_ah hian vice president a ni ngar ngar a, vice president ni rei ber a ni.
November 2020 khan Silchar_ah a kal a. Hemi ṭum hian airport_a amah lo hmuaktu mi ṭhenkhat, AIUDF mi leh sa Badruddin Ajmal thlawptute chu Pakistan ṭan zawngin an au rual niin Sarma hian social media_ah a ziak a.
A thil sawi hi Assamese news channel pakhat, a nupui ta News Live chuan a puang a. Hei hi news channel leh chanchinbu eng emaw zatin an chhuah chhawng bawk a, chung zingah chuan Times Now, CNN News18 leh The New Indian Express te pawh an tel. A thil sawi hi thu dik lo a ni tiin facebook chuan Sarma hi thil engmah share thei lo turin an block phah a ni. Sarma thil sawi hi a video leh thil dang te an han zir chian hnuin airport_a Sarma lo hmuaktute au rual hian politics hruaitu hming ṭhenkhat an lam chhuak a, Pakistan sawrkar thlawpna lam thu erawh chu an sawi lo tih an chhui chhuak a ni.
He thu_ah hian Guwahati Police te pawhin Sarma lakah hian First Information Report an thehlut a. Mipui leh mipui inkara inhuatna chawk chhuak thei thil tipunlunah puh a ni a, chu chu Indian Penal Code leh Technology Act bawhchhiatna a ni.
Hei bakah hian Sarma hi Manabendra Sarma case_ah inrawlha puh a ni a, court_in a thiam lohna a hmu lo thung.
Assam politician lar Akhil Gogoi leh Assam chief minister hlui Prafulla Mahanta te hian thil chi hrang hrangah puh chhe viau ṭhin mah se court rorelnaah thiam a chang zel rih a ni.
India ramin covid 19 thawh hnihna a buaipui vanglai tak, April 2021 khan Himanta Biswa Sarma hian 'an ramah coronavirus a awm tawh loh avangin hmai tuam a ṭul tawh lo' tih a sawi a, mi tam tak ngaihdan a ni lo hle.
June 2021 khan Muslim te chu fa nei tlem tura inzirtir turin a ti bawk a. Hei pawh hi Muslim te chuan an haw hle.
Assam ramah a ruka ran rual tawlh phal lohna dan siam a rawt ṭhin chuan sawi a hlawh hle bawk.
June 2021 vek hian eptu MLA te chu rorel lai BJP zawm vek turin a ti- appeal a, hei pawh hian titi a titam hle a ni.
