JAMES LALRAMLIANA

Pathian thu sawi thin, Sailutar khuaa a thusawi thenkhat vanga titi titam tak hi ka lo la hre ve ngai miah lo mai. Tuna an sawi tak luai luaiah hian ka hre ve ta chauh a, facebook lama an sawi leh a video an post hi ka hriat chhun a la ni rih mai bawk.

Chuti zawng chu ka hriat chin a ni a, ka hriat chin atang hian ka ngaihsan zawng a ni lo takmeuh a, engah mah ka ngai lo a ni ber awm e. Hollywood film lar tak 'End of Days'_a Satan lema chang Gabriel Byrne nen an hmel hi a inang viau maiin ka hre lehnghal (Gabriel Byrne hi film danga a channa ka hre mai lo a ni maithei a, ka hriatna ber chu End of Days hi a ni a, Satan lemah a chang a, chu Satan hmel leh James Lalramliana hmel chu inang ka ti hle tihna a nih chu).

Youtube velah a Pathian thu sawi video a awm a nih pawhin ka en peih ka ring lo.

(April 23, 2021. 06:54 am)

Evan TLUANGTEA

Evan Tluangtea an tih, Pathian thu sawitu lar tak thu sawi hi youtube_ah a tlemte ka ngaithla ve tawh. Lawngtlai_ah sawn emawni, camping an nei dawn nge, crusade an nei dawn zawk ka hre chiang ta chiah lo va, chumi inbuatsaihna vela a thusawi ni awm tak a ni ang, ka ngaihthlak kha.

An rawngbawlna tur kohhran hming kha sawiin, "Nangni kohhran hi ka hmangaih ther te lo che u," a ti vak vak mai a, ka beng a thlep khawp mai.

'Pathian hian min hmangaih em mai a, kei chuan hmangaih miah lo che u mah ila Pathian hmangaihna avangin in zingah rawng kan bawl dawn a ni' a tihna tih kha chu ka hre ve teh meuh mai a, mahse, 'ka hmangaih ther te lo che u' tih chiam chiam kha chu ka ngaithiam thei chuang lo.

Pathianin min hmangaih tih chu ka hria a, mahse min hmangaih ther te lotu Pathian thu sawi kha chu ka ngaithla chak lem tlat lo. Pathianin min hmangaih ang tak chu ni phak em lo mah se, tlem tala min hmangaih vetu hi Pathian thu sawitu zingah an awm ka ring tlat bawk.

Min hmangaih ther te lotu thu sawi ai chuan tlem te tala min hmangaih vetu thu sawi ngaithla zawk ila ka hlawkpui zawk ka ring deuh tlat bawk. Khami zan khan inkhawm ve ila chuan ka chhuah daih duh ka ring hial. Min hmangaih ther te lotu thusawi kha ngaihthla lo mah ila thiam ka inti rilru ang.

Miin thipek hlu tak min pe dawn sela, min pe turin tu emaw rawn tir se, a mi tirh chuan thilpek chu min pek pahin, "Kei chuan he thil hi nei ula ka duh hlawl lo va, mahse min tirtuin pe tur che u a min tih miau avangin ka pe che u a ni," ti ta chiam se min petu chu ka haw ngawtin ka ring a, a hnu zelah pawh ka be tui tawh lem lo maithei. Ka thilpek dawn chu ka hmuh apiangin min hlantu hi ka hre chhuak ang a, ka haw rilru deuh ziahin ka ring bawk.

Thil sawi uar tum lutuk hrim hrim hian that lohna a nei fovin ka ring.

VENG CHHUNG WHATSAPP GROUP

COVID 19 kaihhnawih thu thar te leh mi veng TASK FORCE thu chhuah an hmuh zawng zawng veng chhung whatsapp group_a forward char char tumte hi an taima ka ti ve ngawt mai.

Mizo te'n social media kan hmelhriat atanga lo pung thut, news reporter emaw inti ta tlat zinga mi hi an nih ve tho hmel. Keinin kan hmuh ve chinah hi chuan mi tam takin an lo hmu tawh ang tih hi ngaihtuah pha lem lovin, thil hre rang thei nih chak em emin an phusa thin a ni deuh berin ka hria.

An sawi thin, 'thil forward taima deuh hi mahnia post tur hre lem lo an ni duh' tih hi a dik hmel ka ti tawlh tawlh bawk.

Ka tih duh ve miah lo thil a ni.

(April 18, 2021. Zan dar 9:17)

P&E Department hnathawh dan hi

Nimin, April 15, 2021 khan kan veng YMA ina kawlphetha hrui pawh luhna siam that buaipuiin ka han hnatlang ve teh mial a, kum tam tak chhunga veng tana ka tha thawh leh hmasak ber a ni hial ang; a zahthlak zawk viau.

Electric hrui hi remchang lem lo takin department lamin min pawhsak a, chu chu felfai deuhin kan siam tha a ni ber. A hrui hi YMA lamin kan tum vek a ni awm e.

Chutiang chuan a pawhna hmun kan sawn ta a ni. Zing dar 10:30 velah ka chhuak a, a thawkte nen kan han en vel a, bungraw lain an haw a, an lo kal leh. Leilawn te kan hawh a, an han siam ta a, chawhnu dar 1:30 velah chuan kan zo fel ta mai.

Department hnathawk hi mi 5 an lo kal a, an hlawh atan, mi pakhat zelah cheng 800, belh khawmin cheng 4,000 kan pe.

Mak ka ti viau mai. Kan hnathawh ber hi department hna ni awm tak, an hnain a ken telah ka lo ngai a, chuti chunga YMA_in a hrana sum kan pe hi mak ka ti viau a ni. Hetiang thawk tur hian sawrkarin an la a, an thawh hlawh pawh thlatin an peah ka lo ngai si.

A hrui zawng zawng kan tum vek chunga a rawn siamtute hlawh lehzel kan lo pe hi mak ka ti hle a ni.

KTP lam kaihhnawih

Synod Information and Publicity Department buatsaih, KTP branch hrang hrangte inelna 'Reality Programme insiamsiak'_ah kan branch KTP te'n lawmman pathumna an la a ni awm a, trophy leh cheng 20,000 an dawng a ni awm e; an lawm khawpin ka ring.

He intihsiakna tur video hi hmanni deuh khan Aijal Club_ah emawni an va shoot ni khan ka hria a, engte nge an va tih tak ka hre chiang lo. Partei khan Bible a chhiar ngei tih ka hria a, Mahruaii a solo bawkin ka hre leh; Pathian thu sawite pawh an awm tlatin ka hria.

Khawvelah hian intihsiak hrang hrang hi a tam ngang mai a, tha tih tak tak ka nei a, tul tih loh tak tak ka nei ve bawk a, tun tuma KTP intihsiakna hi tul ka tih loh tak zingah a tel.

A telte hi nasa takin an inbuatsaihin ka ring a, mimal hun tha tam tak an laiin ka ring a, sum pawh eng emaw zat chu an sengin ka ring. Thil chi hrang hrang an sen ral ngaihtuahin, kohhran mite thlarau nunah hlawkna a thlen tam lema ka rin loh vang a ni.

Kohhran leh a chhunga pawl hrang hrang hna ber tura ka ngaih chu chanchin tha puan darh leh mihringte tana thil tangkai tih a nih ka ring a. He reality programme hian chumi kawngah chuan tangkaina a neih tam ka ring vak lo a bi ber ang. Corona virus vanga fimkhur a tul viau laia buatsaih a ni lehnghal.

Pathian thu sawite kha a awm tak tak a nih phei chuan ho ka ti lehzual ang; intihsiakna atana Pathian thu sawi hi ho ka tih zawng a ni angreng viau mai. Hetiang hi chu hollywood lamin an thiam ngawtin ka ring deuh.

Thil dang sawi kai lawk ila, Central KTP hian Pathian fakna video, 'Praise and worship' video te kha an siam thin niin ka hre bawk a, kha pawh kha tul ka tih lem loh thil a ni.

Praise and worship video a nih chuan mimal leh a huhova music video nen hian a dang daihin ka hria. Nung tak, Pathian pawlna ropui tak chang ang taka lan tum rana video siam a tul dawn tlat hian ka hria a, a boruak a rit duh dawn riauin ka hria. Lem chang chung deuh reuh, tui hmel em ema zai a ngai ang a, a tel ve dangte thleng thlengin rau hmel taka lo awm a ngai ang a, lemchang thiam vak lo mi tan chuan hrehawm duh hmel ka ti.

 Tu emaw a han zai a, a zai ve lo tu emaw kha tui hmel em emin a lo awm a, a ban te a lo phar a, a zaituin chang tawp a sak lai phei chuan lo din a, lo hallelui emaw te a ngai maithei a.... chutianga lo ti lo bik nih kha a chi loh deuh roh ang a.....

(April 16, 2021. Zan dar 7:45 vel)

LAL THLÀN NGHAH NI

'Van boruak zau takah khian Jerusalem thar ka hmu' titu Pu Lalliansawma khan vawiin ang, Good Friday dawt chiah Inrinni hi LAL THLÀN NGHAH NI a lo ti a, a sawi Mizo thiamin a tilunglenthlak ka ti ngawt mai.

Pu Sawma hla phuah hi zaipawl leh zaipawl lo pawhin ka lo sa ve fo tawh ṭhin a, hla ṭha pangngai takah ka lo ngai deuh mai ṭhin. Tun hnu, a chanchin kan han hriat chian a, amah tak hi TV lamah te kan hmuh a, a hla phuah dan chanchinte ama sawi ngei kan han hriat hnu hian ka ngai ropui tawlh tawlh mai.

Pathian fakna hla phuahtu zingah hian vanram ngai ber pawl a nih ka ring a, a hla ṭhenkhat a phuah dan a han sawi kha chuan khawvela zaipawl hlapui phuahtu langsar GF Handell_a'n Halleluia Chorus hla a phuah dan an sawi te min tihrechhuak. Handell_a hian Halleluia hlapui hi 'lalthutthleng vela ka chhar khawm a ni' a ti e an tia, pindanah amaha a inkhung laia inlarna ropui hmuin he hla ropui hi a phuah ta a ni ang. Pu Sawma pawhin a hla pakhat ('Lalpa chu a tho leh ta' tih a ni mai thei) hi ruahpui vanawn surin an inchung rangva a nan rik bur bur kha van zaipawl zai ri anga hriaa a phuah a ni a, chuta zaite chu an ke leh an kut vai siau siau te pawh a hmu a ni awm e; a ropui ka ti. Mi ropuiin thil an tawn chuan engkim mai hi a ropui a, ruahin inchung a nan rik pawh van zaipawl ri anga riin, hla ropui lo pian chhuahna hmanrua a ni thei daih a nih chu.

Pu Sawma leh Handell_a hi tunah chuan vanramah an inkawm ang a, vanram ngaih hla chungchang sawiin an titi tui viau ṭhin te hian ka ring a ni.

Pu Lalliansawma hi Darlung khua niin an kohhran tual upa min a ni ('upa min' kan nei a, 'tual upa min' hi kan neih leh neih loh ka hre chiah lo va, ka risk a nih hi). Hetianga mi ropui hi chu an khaw mi leh sa nih ringawt pawh hi inchhuanna tham a tling ṭhin a, ka facebook ṭhian zingah Darlung khua in awm chuan lo intithei viau teh u. Ka ṭhian ka hriat chian zingah Darlung lam hnai deuh ber chu Sir Bk's Chongthu hi a ni mai a, ani hi ṬKP lama kan unau, ṬKP rawngbawlna vanga chanchinthara lang tawh a ni a 😀, a ropui thawkhat viau bawk e.

Good friday tlai suangtuahna vak kual

"Tuah thing an lo rem khawm, Kalvari tlang chungah

Kilhna an lo chher khawl, ka Lalpa kilna tur

Ka Lal an khai kang e, sakhmel chul ri riaiin

A nakah an chhun a, thisen leh tui a chhuak

Zion kulhpui chhungah za ral an rel sual e"

A hun lai tak takah chan ta ila, tun ang hun vela Jerusalem khawpui boruak chu ngaihṭhat thlak loh zetin a reh vung vung maithei e. Nichin deuh mai khan khawvel kha ni dang ang lo takin, ni tlak hma hauhin a thim ringawt mai a, kha ringawt pawh kha philina tham chu a ni. Chu mai a la ni lo va, nasa takir lir a nghing a, Juda hnam leh sakhaw hmunpui ber, an temple_a puanzar kha a laiah a thler tlang pawp mai tih thuthang te a lo awm lehnghal.

Zeldin chhunzawm ila, kha thil leh a kaihhnawih kha whatsapp group hrang hrangah an vawrh darh a, puanzar a thler lai khan a bulah Kaiapha hnuai chiaha puithiam pakhat kha tekin a deng thlu a, tunah pawh a la harh lo tih thu rawn post te an awm a, chu chu ṭhenkhatin thu belhchian dawl lo niin an lo sawi bawk.

Mi pakhatin puanzar thler thlalak ni awm tak, chhuata inzam hnawk nuai hi a rawn post a, Mizo Special Report_ah mi nuai chuangin an comment hnuin mi pakhatin thlalak chu hmana mi tawh, puanzar an zar dawna an inbuatsaih laia mi a ni tih a sawi leh bawk si.

Rome khawpuia emperor Kaisara'n Isua an tihhhlum avangin Jerusalema Sanhedrin rorel khawlpui chu engmah ti thei rih lo turin sipai chakna hmangin a thunun rih dawn a, sipai phurhna tur lawng pawh Mediterranian tuipuia mi an chah khawm mek a, darkar 12 hnuah Israel panin an inkar chhuak dawn tih te a awm bawk.

Hetihlai hian Isua aia an chhuah tak Baraba kha Jerusalem chhim thlang lama a ṭhianpa inah a awm a, Isua thih lai vel khan a awmdan a danglam thut a, Isua chhanchhuah tumin Kalvari tlang lamah ralthuam nen kal a tum a, a ṭhiante'n an dawm bet tih sawi a awm e. Ṭhenkhat erawh chuan 'uaiin a in lo rei tawh a, a rui buai a nih chu' an lo ti bawk.

Isua zuitu hmeichheho an khawngaihthlak ngei mai. An mipate zingah tumah hmuh tur an awm lo a ni ber. Zanah khan rorelna hmun velah Petera kha ṭi hmel takin a va lang ve kha a ni a, khua a var fel tih aṭang khan a reh ta vang vang mai si. An zinga awm chhun chu a ṭawng chunnu deuh ber Johana a ni mai a, ani pawh Mari Magdalini  bula a khawsak vang mai mai a ni. A mipa ber chu a thlamuanpuiawm hran lo khawp mai si a, hmeichheho aiin a lung a chhe nasa mah zawk emaw tih tur a ni si.

Mahse, an beisei ngam loh tawp thil an tawng tlat. Sanhedrin roreltu zinga mi, Arimathai khaw pa Josefa kha a lo lang nawlh mai a, hmeichheho kha a huikhawm a, Pilata banglaah te a kualpui thuak thuak hnuin Isua ruang kha kraws aṭanga la thlain khawiah emaw an kalpui ta a.... engtin nge an awm zel ka hre tawh lo; Mari hian call a la thei tlat lo va..... Petera phei chu nizan atang khan a phone a off char char ✝️

(2021 Good Friday zanah eng emaw mai mai ka thai kual a nih hi)

Good Friday hla leh a kaihhnawih tlem

'A MI'N RUAI ROPUI AN ṬHEH A' tih hla hi ka KṬP chhungin ka sa ve ta miah lo va, sa lo mai ni lovin a zir pawh ka zir miah lo; ka thil ui pawl tak zingah a tel.

Kan KṬP ve tirh aṭang khan Good Friday apiang hian rual u deuh leh nu leh pa hovin 'A mi'n ruai ropui an ṭheh a' tih hla hi Good Friday nena inhmeh hlaah chuan hla ropui an tih ber zinga mi a nih thu hi an sawi fo va, eng vanga zir ve ta miah lo nge kan nih ang aw?

Kohhran zaipawlah na na na hi chuan ka theih leh ka peih dan tawk tawk chuan ka ti nasa ve ṭhin ngang mai a, a hotu lam, a hla zir tur thlangtu zingah pawh tel ve ṭum ka nei. Chuti chung chuan he hla, ka ngaihsan em em hi zir turin kan buatsaih ngai tlat si lo.

Ih, ka zirin ka la sa lo mai pawh a ni lo, a tonic solfa nena inziak pawh ka la hmu lo hial a ni awm e. He hla ropui tak nen hian kan intawk làwi thin ni tur a ni; KPP lamah te kan la sa vak vak mahna. KPP zai dan hi zai dan nuam ka tih chi angreng tak a nia, theitawpa zai nghek nghek, a tui apiang zai rin ang type hi a awlsam mai.

Good Friday hi chu a mihring lam deuh taka ngaihtuah chuan lusun hun a ni a, kan suna lah hi mi namai a lo ni si lo va, rilru kuai lungchhe zawnga thu leh hla nei thiam an awm chuan a mi hneh dan a thuk thei riau bik.

Hmar hi Isua sunna lamah hi chuan an lung a no deuh a ni maithei, L Keivom em ni, 'Hmar hi Isua Krista tawrhna avanga ṭap nasa ber hnam an ni ang' titu kha aw? Ka hre sual maithei. Pu Malsawm Kawlnia pawhin heti hawia a hauh fiamna thu lar tak pawh a awm kha.

Chutiang chu a nih vang a ni ang, Good Friday hla ṭha hi Hmar ṭawnga phuah hmasak, Lusei ṭawnga lehlin tak a awm teuh ni. Good Friday hla, zaipawla ka sak ve tawh zinga min la hneh ve deuh ber 'Ka hreng kawl bun, ka hreng thir kawl' tih hla pawh kha Hmar ṭawnga Rev Thangngura phuah an ti tlatin ka hria.

Kan thupui ber 'A mi'n ruai ropui an ṭheh a' tih pawh hi Hmar ṭawnga phuah a ni tho maithei, tunhma chuan tunlaia an sak anga khawng ni lo, nem deuh hnalhin an sa a, lung a kuai bik te an tia lawm. A tenor hi a sang tluan deuh ṭhak an tia, Paite zaipawlah a sang ber part, 'a ëu' an tih ang deuh a ni an ti.

Sawi tawh angin Good Friday hi chu thinlunga a thawh dan hi lung no ko chhuak chi hi a ni deuh a, a inhmeh tur zaipawl hla ṭha tak tak pawh kan nei nualin ka hria. Hlapui 'Chu zan khawharah' tih te kha a nalhin a pui ka tia, a bass_in 'venpui an awm lo....mahriakin a vai' an han ti chho te kha a ropui riau. 'Aw, Jerusalem' tih hla, 'hmangaihtu i hai der ta maw' tih te awm pawh kha sak a nuam ka tia, 'Phu loh hmangaihna' te pawh hi ṭha ka ti em em bawk.

Zai khawmnaa sak chi phei hi chu kan nei ṭha ka ti takzet mai. A rang chi kan duhin 'Thu mak ka sawi nin theih loh chu' tih te, 'Thisen hlu, thisen hlu' tih te leh a dang tam tak kan nei a, a muang deuh chi kan duh lahin 'Ngaiteh Kalvaria i lungngaih ni_ah khan' tih te, 'Zan lungngaihthlak Zion pindan chhungah' tih te leh a dang dang kan ngah mai.

Good Friday pual deuh hlaa chhiar theih chiah loh, ni ve deuh tho si_ah chuan Pu V Thangzama hla 'Lungngaihna hual velin' tih hi nalh ka ti maw aw. A changin kulmuk hmel takin a han indawm puk ruih ruih mai a, a chang leh a thu nena inhmeh turin a zuang leh theuh theuh thung a, a thuin a tum vawrtawpah chuan sang takah a invawrh chhuak ṭhuai ṭhuai mai bawk si; pui ti tak ka ni. A reng rengah, pu Thangzama, PS Chawngthu leh Pu Lalkhawliana hla phuahte hi a thluk a changkang ṭhin ka ti a, mahse a changkang ka tih dan tak chu ka sawi chhuak thiam si lo; rimawi thiam tak phuah tih a hriat bikin ka hre ṭhin.