Task Force Duty

 Hripui dona tura tualchhung viltu tura sawrkar thupeka din Village/Local Level Task Force_te hi an fakawm a, hah pawh an hah ngawt ang. Mahse, "In hah em mai, lo chawl tawh ula, mi dangin lo thawk ve tawh rih rawh se," ti ila, tam tak hi chu an lawm lo ru hle ang a, an nui tawi tak mai ang. Anmahni tantu deuh nia an hriatte bulah phei chuan an ang an ang mai ang.

'Eng nge a chhan ni ang? A hahthlak tehreng nen' kan tih chuan..... thu neih an chak a ni! Khawlaia mi chhuak lo hau theitu nih an chak a, khawlaia lirthei tlan lo tiding thei nih hi ropui an ti a, miin thil pawimawh tihtur an neih changa phalna pe theitu, chhuah phalna lehkha ziak theitu nih kha nuam an ti rilru hle a ni.

Mahni inah mahni hna tul thawh tur nei reng chung pawhin Task Force Office lama thut a, phone khawih vel mai mai kha khawtlang tana inpekna ropui takah an ngai lui tlat a (an rilru chhungrilah chuan an tangkai lem lohzia an hre tho va, an hre duh lo), an duty reng mai a ni. 

A chang chuan hna hahthlak tak tak an thawk a, zan rei tak tak thlengin an tul tak tak thin. Mahse, heng hrehawm zawng zawng hian pawimawh nia an inhriat vanga nuam an tihna kha a buk kang zo lo va, an bansan phal teuh lo mai. Sawi tawh angin, chawl rih mai tura duhtu leh sawipuitu an tawn vaih chuan an thin a rim tun ang a, an rilru a na ngawih ngawih mai ang.

Sawrkar lam atanga mi pawimawhin an lo tlawh changa badge awrha lo dawnsawn te kha ropui an ti em em mai a, 'in hah mang e aw' tia fakna thu an han hriat phei chuan an thinlung hi hawi sang tak a ni.

Heng mite hi dem theih pawh an ni chiah lo va, mihring zawng zawng tih theih hi mi pawimawh nih chak kan ni a, thinlungin a ken tel angin an khawsa a ni ve mai. Hri hi a leng zel a, a ngai hlir hi an duty a nih phei chuan 'ber thla' velah chuan an lal tawh ngawt ang a, thenkhat phei chuan thamna sum an it rum rum tawh maithei a ni.

(May 10, 2021, chawhnu dar 2 vel)