Isaac Herzog

Isaac Herzog, Bougie tia koh bawk, Israel President atana thlan thar hi September 22, 1960 khan Tel Aviv-Yafo, Israel_a piang a ni. A hming Isaac hi Yitzhak tia ziah a ni bawk ṭhin. A pa hi kum 1983 aṭanga kum 1993 chhunga Israel President lo ni tawh General Chaim Herzog a ni a, President 6_na a ni. A nu hi Aura Ambache niin, Israel mipuite hmasawnna ngaihtuahtu pawl lar tak Council for a Beautiful Israel dintu a ni. Pianpui unau 3- mipa pahnih leh hmeichhia 1 a nei.

A pa lama a pu Rabbi Yitzhak HaLevi Herzog hi Juda sakhaw hotu lar a ni. 

A pa hi Ireland rama piang niin a nu hi Egypt rama piang a ni ve thung a, Europe khaw thlang lam- Poland, Russia leh Lithuania vela khawsa ṭhin Juda thlah an ni. 

Tel Aviv khawpuia piang ni mah se a pa hi United Nations_ah Permanent Representative of Israel a nih avangin New York_ah a seilian a, Ramaz School_ah a kal ṭhin a ni. High school a kal laiin Cornell University leh New York Univrersity_ah thil dang a zir pah ṭhin bawk.

Kum 1978 khan an chhungkua hi Israel ramah an haw leh a, Herzog hian Israel Defence Force a zawm a, Intelligence Corps_a Unit 8200_ah major officer a ni ṭhin a ni. 

Sipai hna bakah Tel Aviv University_ah dan (law) a zir bawk a, a pa din law firm- Herzog, Fox & Ne'eman_ah pawh a thawk ve tawh bawk.

Kum 1999 khan parliament inthlan a chuh ve a, a tlin zawh loh avangin Ehud Barak_a sawrkarah khan Government Secretary a ni a, kum 2001_a Ariel Sharon_a'n Barak hneha Prime Minister a nih thleng khan he hna hi a thawk a ni.

1999 kuma "Amutot Barak" scandal an tih mai, party te hnena sum pek chungchanga thil dik lo awm nia sawi chhui a nih ṭum khan chhui zingah a tel ve a, mahse engmah sawi lovin a ngawi tlat thung. A tawpah chuan an puhnaah hian finfiahna ṭha tawk a awm loh avangin Attorney General chuan a case hi a titawp ta a ni.

Kum 2000 aṭanga 2003 thleng khan Israel Anti-Drug Authority_ah chairman a ni bawk.

Kum 2003 inthlanah khan Labor Party aiawhin parliament member atan thlan tlin a ni ve ta a. January 10, 2005 kuma Labor Party chu sawrkarna siamtu Ariel Sharon pawla an tel ve takah khan Minister of Housing and Building_ah ruat a ni. Mahse, November 23, 2005 khan an party hian sawrkar chhuahsanin ani pawh hi a hna aṭang hian a bang ve bawk a ni.

Kum 2006 inthlan hmachhawn tur zawnga Labor Party hruaitu thlannaah Herzog hi pahnihna a ni a, Ehud Olmert_a Kadima party leh mi dangin sawrkar inṭawm an siamah khan Minister of Tourism a ni. Mahse 2007 kumah ṭangrual pawl zawm thar Yisrael Beiteinu chu Tourism minister atan dah a nih tak avangin Herzog chu Social Affairs ministry_ah dah a ni ta thung. Hei bakah hian Minister of the Diaspora leh Society and the Fight Against Antisemitism atan ruat a ni bawk. 

Kum 2009 inthlan tur inbuatsaihnaa an party hruaitu tur thlannaah pahnihna a ni leh a, inthlan a lo nih khan Minister of Welfare & Social Services leh Minister of the Diaspora, Society, and the Fight Against Antisemitism atan dah a ni. 

January 2009 khan Prime Minister Ehud Olmert chuan Gaza mipuite dinhmun chawikanna tura hma latu pawlah Israel Government Coordinator atan a ruat a. Ehud Barak_a'n Labor Party a chhuahsan a, 2011 January thlaa party thar Independence a din khan Herzog pawh hi minister a nihna aṭangin a bang ve a ni.

Kum 2011_a Labor Party president thlannaah Herzog hian Shelly Yachimovich leh Amir Peretz te tluk lovin 3_na a ni.

November 22, 2013 khan Herzog chu Labor Party president atan Shelly Yachimovich hnehin thlan a ni ta a, parliament_ah opposition leader a ni ta nghal bawk. Labor Party president thlannaa a hneh tak Yachimovich nen hian an ngaih pawimawh zawng a inang lo va, Yachimovich hian sum leh pai dinhmun lam a ngaih pawimawh laiin Herzog hi chuan ram venhimna leh Palestinian te nen an inkar chin fel lam a ngai pawimawh thung.

President thlan a nih hnu ni 10_naah Herzog hian Palestinian President Mahmoud Abbas kawmin ram pahnih- Israel leh Palestinian te thutlukna a ngaih pawimawh thu a hrilh ngat a. An khingpui party Shas hruaitu Aryeh Deri pawh kawmin party pahnihte'n thawh dunna ṭha an neih theih dan tur a sawipui nia sawi a ni bawk. 

Kum 2014, June thla khan Herzog hian Prime Minister Benjamin Netanyahu chu kawng hrang hranga a chetnaah a sawisel a. Khawvel hnam dangte nena thawh hona chungchangah te, Palestinian te nena remna a awm theihna tur ruahmanna siam chungchangah te leh ṭangkai taka US President Barack Obama thawhpui chungchangah te Netanyahu hi a hlawhchham niin a sawi a ni.

Netanyahu_in Barack Obama a haw tlat chu a hlawhchhamna lian tak niin, Israel ram himna chu dinhmun hlauhawmah a awm phah niin a sawi.

Ṭangrual sawrkar a lo tawp a, kum 2015_ah inthlanpui a awm dawn nia sawi a nih khan Herzog hian Hatnua leh Kadima party te chu Labor Party zawma sawrkar siam puiah a sawm a. YNET_in an kawmnaah, "Netanyahu thlak tur hian ka ṭha tawk a, inthlan a awm hma hian ṭangrual pawl thar din ngei tumin nasa takin ka bei ang," a ti a ni. Hemi hnu lawk hian Herzog leh justice minister ni mek, party ṭan lam tina vak lo Tzipi Livni te chuan Netanyahu paih thla turin ṭangruala an campaign dun tur thu an puang ta a. Anni pahnih ṭangrual hian an hmingah Zionist Union an invuah a, kum 2015 inthlanpuiah chuan seat 24 zet an la ta a. Seat 30 latu Likud Party chuan sawrkarna siamin opposition lamah member ngah ber an ni. 

Kum 2017 July thlaa Labor Party hruaitu thlannaah Herzog hi a tling zo lo va, Avi Gabbay chu thlan a ni a. Mahse Gabbay hi parliament member a nih ve loh avangin Herzog hi Israel parliament- Knesset_ah chuan opposition leader a la ni reng tho a ni. Hemi hnu hian Jewish Agency for Israel chairman atan thlan a nih tak avangin opposition leader a nihna aṭangin a bang a, Knesset aṭang pawhin a bang bawk. Opposition leader a nihna hi Tzipi Livni chuan thlakin Knesset_ah chuan Robert Tiviaev_in a thlak thung. 

Kum 2018 June thla khan Herzog hi Jewish Agency for Israel atan hneh taka thlan tlin a ni a. Juda mipui leh Israel sawrkar inkar ṭha taka a awm theih chu a thiltum lian zinga pakhat a ni. YNWT news_in an kawmnaah Juda leh Juda ni lo an inneih pawlh ṭhin chu hripui anga hlauhawm niin a ngai tih sawiin siam ṭhat ngei a tum thu a sawi a ni. 

October 24, 2018 khan Herzog ho hian Jewish Agency_a Board of Governors ṭhukhawm chuan Israel sawrkar thupui ber chu Israel_in independence a puanna ang zela kal chhoh a ni tih an sawi chiang a. Pittsburgh khawpuia Juda mite inkhawmna hmun- synagogue chhunga inkahna a thlen ṭum khan Herzog hian khawvela Judate ngaihtheihlohna- anti-Semitism lo hluar chho chu a ngaihven reng thu a sawi. European Parliament_in Brussels khawpuia Nazi hovin Judate a suat hriatrengna ni- International Holocaust Remembrance Day an hmannaah European ramte chu Judate ngaihtheihlohna lo hluar zel chu do tur leh International Holocaust Remembrance Alliance chu anti-Semitism doba ṭulzia hrilhfiahna anga ngai turin a sawm a ni.

Kum 2019 March thla khan Jewish Agency chu an hnathawkte chhungkaw dinna tura a sum hmanga ṭanpuina pe ṭhin hmasa ber a ni a; ṭanpuina pek tur hian gay leh fa nei, nupui pasal nei si lo te pawh a huam a ni. 

May 19, 2021 khan Herzog hian Israel President 11_na thlan turah chuh a tum thu a sawi a. June 2, 2021 khan Knesset chuan President atan a thlang ta a, Reuven Rivlin a thlak ta a ni. 

Inthlanah hian Miriam Peretz nen an inkhing a. Israel Parliament- Knesset_ah hian member 120 an awm a, President thlannaah hian Mansour Abbas chu a kal loh avangin vote 119 a tla a, Herzog hian vote 87 hmuin Peretz hian vote 26 a hmu thung a, vote thi, thlan nei lo mi 6 an awm bawk.

Peretz hi tling se chuan Israel President hmeichhe hmasa ber a ni dawn a, mahse a tling zo ta lo a ni.

Herzog nupui hi Michal niin fapa hlir 3 an nei a. An naupan lai aṭanga an chenna in, Tel Aviv khawpui kianga Tzahala_ah an khawsa mek a ni.